English This article is also available in
– “1331 يوم متبقي حتى الحرية. لا تفاصيل عن الكيفية والأسباب”.
– الصبر صعب. ورغم ذلك أنا بعتبره درس قاسي عشان أعرف قيمة الحرية لي ولكل الكائنات الحية. بعد الأيام دي هيكون عندي وقت أعيش وأنا مستعد لإني أعيشه على أكمل وجه. لحد الوقت ده ماييجي هحاول أراجع نفسي وأفكر فإيه اللي ممكن أعمله عشان أحسّن من حالتي النفسية وحياتي بشكل عام.
– أولاً، أنا تركت أكل اللحوم نهائي. ورغم إن ده المفروض يكون شيء طبيعي ولكن نوعاًَ ما حسيت إني أفضل نفسياً. أنا بحب الطبيعة بشكل كبير ولما بفكر فإزاي قضيت كل السنين دي بفكر فنفسي مش فبقية الحيوانات التانية شيء مؤلم. ولكن الوقت ده انتهى وبتمنى تعملوا كمان كدا دي طريقة أفضل في النظر للحياة.
– بحاول أقضي وقتي أتعلم حاجات جديدة. بدءاً من البرمجة وتصميم المواقع. قضيت أيام كتير عشان أخرج موقعي sherifgaber.com بالشكل اللي عليه دلوقتي. عايز أكتب واشارك فيه أفكري بانتظام لكن حالياً بفكر أكتر فالفيديوهات.
– وبمناسبة الكلام عن الفيديوهات. أنا خلال الأسابيع اللي فاتت كنت بكتب كذا فيديو ممكن فعلاً يغيروا طريقة تفكير ناس كتير لو أكملتهم ونزلتهم عاليوتيوب. لكن لو عملت كدا مش هيكون تصرف ذكي. حتى لو الفيديوهات مكنش فيها أي حاجة ناس ممكن تشوفها معينة لمعتقداتهم ولكن مازال هناك مخاطرة. ورغم إن المخاطرة أحياناً بتؤدي لأشياء أفضل لكن أحياناً برضه بتؤدي لندم. عشان كدا بفكر كتير إذا ما كان الأفضل إني أخلص الفيديوهات وأرفعها ولا أنتظر. أنا حتى فكرت أغير نوعية الفيديوهات حالياً لحد ما الوقت يكون مناسب أستكمل الفيديوهات اللي بعملها لكن مش حابب احس إني بتجنب شيء عشان خايف منه.
– أنا عايز أتفاعل أكتر مع الناس. السنوات اللي فاتت فعلاً حطمت شيء جوايا. وعلى الرغم من إني بحب الناس كلها فعلاً ومتفهم كل فعل سيء من أي حد لكن رغم ذلك مش حابب أتفاعل مع الناس ولا أنشر أي شيء عن أي شيء. ده شي مش صحي عشان كدا فكرت فإني أتعلم فن التصوير وأشرككم الصور اللي بلتقطها على الانستجرام على طول. أعتقد إن مع الوقت ده هيخليني أحس إحساس أفضل من اللي أنا بمر بيه بقالي فترة.
– في النهاية بتمنالكم السلامة من اللي بيحصل الأيام دي. الحياة تستحق نعيشها.
